МВФ палепшыў прагноз па росце беларускай эканомікі адразу на 1% — да 1,7%

Міжнародны валютны фонд павысіў прагноз па росце беларускай эканомікі адразу на 1%. Усяго месяц таму, у пачатку кастрычніка эксперты фонду лічылі, што ВУП Беларусі па выніках 2017 года прырасце на 0,7%. Аднак 9 кастрычніка на брыфінгу па выніках двухтыднёвай працы місіі МВФ у Беларусі была агучаная новая лічба — 1,7%.

Днямі прагноз па росце ВУП Беларусі ў 2017 годзе палепшыў Еўрапейскі банк рэканструкцыі і развіцця — да 1,5%.

"Мы чакаем, што эканамічны рост у Беларусі ў 2017 годзе дасягне 1,7%, а ў сярэднетэрміновай перспектыве ён захаваецца на ўзроўні 2%, — заўважыў кіраўнік місіі МВФ Пітэр Долман. — Аднаўленне эканамічнага росту тлумачыцца істотным паляпшэннем знешнеэканамічных умоў, а таксама рашучымі дзеяннямі ўрада на працягу апошніх 2,5 гадоў. Ураду давялося прыняць шэраг няпростых рашэнняў, якія тычацца ўзмацнення жорсткасці грашова-крэдытнай палітыкі і лібералізацыі цэнаўтварэння. Мы назіраем рост спажывання і інвестыцый, абменны курс стабілізаваўся, а інфляцыя скарацілася да адназначных велічыняў".

Кіраўнік місіі МВФ падкрэсліў, што важнай праблемай беларускай эканомікі застаецца сектар дзяржаўных прадпрыемстваў, які "ў значнай ступені нерэфармаваны". "Многія прадпрыемствы пры гэтым разлічваюць на дзяржпадтрымку, на якую расходуецца да 2,2% ВУП, — адзначыў Долман. — Калі ўрад Беларусі не распачне рашучых крокаў [па рэфармаванні дзяржсектара], рост у сярэднетэрміновай перспектыве будзе абмежаваны 2% у год".

У МВФ лічаць, што ў выпадку актывізацыі рэформаў у сярэднетэрміновай перспектыве эканамічны рост можа паскорыцца да 4% у год. Пры гэтым "рост будзе абмяжоўвацца негатыўнымі дэмаграфічнымі тэндэнцыямі, млявай кан'юнктурай крэдытнага рынку і адставаннем прадукцыйнасці і канкурэнтаздольнасці".