На пажары ў жылым доме ў Нью-Ёрку загінулі 12 чалавек

У выніку пажару ў жылым доме ў Нью-Ёрку загінулі 12 чалавек. Яшчэ чатыры чалавекі, па заяве гарадскіх уладаў, атрымалі сур'ёзныя апёкі і знаходзяцца ў рэанімацыйных аддзяленнях. Улады горада не выключаюць, што колькасць ахвяр можа ўзрасці, паведамляе Reuters.

Мэр горада Біл дэ Блазіа заявіў, што гэты пажар з'яўляецца самым страшным за апошнія 25 гадоў.

Вядома, што ў пажары загінула аднагадовае дзіця. Самай сталай ахвяры агню 50 гадоў, паведаміў прэс-сакратар мэрыі Нью-Ёрка Даніэль Нігра.

Пажар адбыўся ў жылым доме на 25 кватэр у Бронксе. Ён пачаўся каля 19:00 па нью-ёркскім часе (03:00 па Мінску). Па дадзеных пажарных, ачаг загарання знаходзіўся на другім паверсе. Адтуль агонь хутка распаўсюдзіўся па ўсім будынку.

Прычына ўзгарання пакуль невядомая.

Пажарныя прыбылі на месца на працягу трох хвілін, у тушэнні пажару бралі ўдзел каля 160 чалавек.

У Нью-Ёрку зараз стаіць незвычайна халоднае надвор'е. Слупкі тэрмометраў апускаюцца да -7, а звычайная снежаньская тэмпература для "Вялікага яблыка" складае -1 градус Цэльсія.