Новая кніга Джоан Роўлінг і чэхі, якія перайшлі на прасека — #ІхНоравы

20/09/2024 - 14:55

Замежныя навіны / @rubanau_collage

Пакуль Зямля чакае свайго другога спадарожніка, які будзе круціцца вакол яе два месяцы, Джоан Роўлінг расказала, што плануе напісаць раман. Паводле пісьменніцы, гэта будзе “футурыстычны твор”, але яна не плануе ператвараць яго ў “касмічную адысею”.

Як змяніўся каранавірус і чаму чэхі перайшлі на прасека? Пра гэта і не толькі чытайце ў нашай традыцыйнай рубрыцы "Іх норавы".

Чарговая “карона”

Медыкі рэкамендуюць еўрапейцам вакцынавацца ад каранавіруса да пачатку зімы.

Новы варыянт XEC, які распаўсюджваецца ў Еўропе і па ўсім свеце, неўзабаве можа стаць дамінантным.

— Мы чакаем, што XEC будзе мець падобныя ўласцівасці з наяўнымі варыянтамі. Пры гэтым эфектыўнасць вакцыны супраць цяжкай формы захворвання не зменіцца. Вакцынацыя — найлепшая мера абароны ад больш цяжкіх формаў кавіду і сезоннага грыпу, — кажуць навукоўцы Еўрапейскага цэнтра па прафілактыцы і кантролі захворванняў.

Варыянт XEC — гэта гібрыд ранейшых субварыянтаў амікрон KS.1.1 і KP.3.3, якія дамінуюць у Еўропе цяпер. Навукоўцы лічаць, што мутацыі XEC могуць спрыяць яго лягчэйшаму распаўсюду ў новым сезоне.

Сімптомы — тыя ж, што і раней: высокая тэмпература, ламота, стомленасць, кашаль ці боль у горле.

Большасць людзей пачынаюць адчуваюць сябе лепш ужо праз некалькі тыдняў пасля COVID, але аднаўленне можа заняць больш часу.

— Пакуль новы штам не адпавядае крытэрам, каб стаць варыянтам, які выклікае заклапочанасць у органаў аховы здароўя. На сёння зарэгістраваная толькі нязначная колькасць захворванняў, выкліканых XEC, — заяўляюць навукоўцы.

Яны выявілі варыянт XEC у Берліне ў чэрвені. З таго часу ён быў знойдзены прынамсі ў 11 еўрапейскіх краінах і яшчэ ў чатырох краінах свету.

Другі спадарожнік Зямлі

Увосень на два месяцы ў Зямлі з'явіцца другі спадарожнік.

Гравітацыйнае прыцягненне захопіць астэроід, і ён прабудзе з планетай ад 29 верасня да 25 лістапада. Увесь гэты час ён будзе круціцца вакол Зямлі, як міні-Месяц, а пасля вернецца ў пояс астэроідаў.

— Астэроід належыць да другаснага пояса астэроідаў Арджуна. Некаторыя з іх могуць набліжацца да Зямлі на адлегласць каля 4,5 мільёна кіламетраў і станавіцца часавымі спадарожнікамі, — кажа даследчык Карлас дэ ла Фуэнтэ Маркас.

Са слоў прафесара, астэроід не будзе круціцца па поўнай арбіце Зямлі. Убачыць яго ў невялікі аматарскі тэлескоп будзе праблематычна, аднак з дапамогай прафесійнай апаратуры яго ўдасца заўважыць. Паводле ацэнак навукоўцаў, міні-Месяц зноў вернецца на зямную арбіту ў 2055 годзе.

Чэхі і прасека

Чэхі перастаюць ужываць моцны алкаголь. Пра гэта кажуць звесткі Саюза вытворцаў і імпарцёраў спіртных напояў краіны.

Згодна з імі, продажы вытворцаў у Чэхіі знізіліся на 51,3% у першай палове гэтага года ў параўнанні з аналагічным перыядам мінулага года. Спажыванне піва таксама падае. Людзі п'юць больш віна, прасека ці кактэйляў, у тым ліку безалкагольных.

У першым паўгоддзі 2024-га чэшская дзяржава сабрала такую ж суму акцызу на спіртныя напоі, як і ў 2023 годзе, нягледзячы на яго павышэнне.

Зніжэнне спажывання моцнага алкаголю, асабліва сярод маладога пакалення, пацвярджаюць і звесткі кампаніі Dotykačka, якая эксплуатуе касавыя сістэмы.

Меркавалася, што павышэнне падатку на спажыванне алкаголю павялічыць паступленні ў дзяржбюджэт сёлета на паўмільярда-мільярд крон, аднак прадстаўнікі саюза сцвярджаюць, што сітуацыя зваротная і даходы будуць ніжэйшыя.

Новы раман Джоан Роўлінг

Аўтарка серыі раманаў пра Гары Потэра Джоан Роўлінг заявіла, што плануе напісаць футурыстычны твор.

— Футурыстычны раман нельга назваць "касмічнай адысеяй". Кніга будзе пра жыццё на Зямлі, — папярэдзіла пісьменніца, але іншых падрабязнасцяў не раскрыла.

Джоан Роўлінг таксама прызналася, што адначасова працуе над трыма рознымі гісторыямі. Яна назвала сябе “жудаснай працагалічкай”. У траўні гэтага года аўтарка заявіла, што збіраецца напісаць яшчэ шэсць кніг, тры з якіх — пра Кармарана Страйка.