Падрабязнасці затрымання беларуса расказалі ў СБУ
СБУ затрымала беларуса па абвінавачанні ў шпіянажы / t.me/SBUkr
Беларуса, якога затрымалі напярэдадні ў Ровенскай вобласці, падазраюць у супрацы з КДБ і шпіянажы за паўночнай мяжой Украіны. Падрабязнасці яго справы паведаміла прэс-служба СБУ ў сваім тэлеграм-канале.
Як распавядала Еўрарадыё, грамадзяніна Беларусі, які нарадзіўся і жыве ў Ровенскай вобласці, арыштавалі на два месяцы. Мяркуецца, што ён збіраў даныя пра перамяшчэнне ўкраінскіх войскаў і вайсковай тэхнікі ў раёнах, памежных з Беларуссю.
У СБУ кажуць, што яшчэ на пачатку шырокамаштабнай расійскай агрэсіі мужчыну завербаваў супрацоўнік КДБ. Беларуская спецслужба звярнула ўвагу на яго як на былога камандзіра падраздзялення дэсантна-штурмавых войскаў часоў СССР. Тады ён ваяваў у Афганістане.
Затрымалі беларуса, як паведамляецца, у яго дома падчас чарговай спробы перадачы разведданых у Беларусь.
