Расійскі Чырвоны Крыж прасіў беларускіх калег узгадняць паездкі на Данбас

Расійскі Чырвоны Крыж прасіў кіраўніка Беларускага Чырвонага Крыжа Дзмітрыя Шаўцова узгадняць паездкі на Данбас. Інфармацыю пра гэта Радыё "Свабода" атрымала ад "Кіберпартызанаў", якія перадалі выданню падборку дакументаў з паштовай скрыні БЧК.

Ліст з Расіі быў дасланы летась у ліпені — пасля таго, як Шаўцоў наведаў акупаваныя ўкраінскія тэрыторыі, дзе хадзіў у камуфляжнай вопратцы з літарай Z. Старшыня Расійскага Чывонага Крыжа Павел Саўчук у лісце занепакоены тым, што СМІ згадваюць візіт дэлегацыі БЧК, у тым ліку негатыўна.

"Улічваючы шырокі грамадзкі рэзананс, хацеў бы пацвердзіць неабходнасць своечасовага ўзгаднення такіх візітаў з РЧК. Згодна з заканадаўствам Расійскай Федэрацыі тэрыторыі Данбаса, Херсонскай і Запарожскай абласцей з'яўляюцца часткай Расіі. Грунтуючыся на прынцыпе адзінства, БЧК, як і іншым нацыянальным таварыствам, пры планаванні гуманітарных місій на расійскіх тэрыторыях трэба атрымліваць на гэта згоду ў РЧК", — робіць Саўчук вымову беларускаму калегу.

У каментары "Свабодзе" прадстаўніца РЧК Анастасія Тэнэта заявіла: "Гэта ўнутраная перапіска. Дзіўна, як які-небудзь ліст можа выцечы ў публічную прастору. Значыць, вы ўсё маеце па гэтым лісце".

Дзмітрый Шаўцоў адзначыўся не толькі паездкай на Данбас у вопратцы з літарай Z, але і заявамі вываз украінскіх дзяцей і пра ядзерную зброю ў Беларусі. Пасля гэтага Міжнародная федэрацыя Чырвонага Крыжа і Чырвонага Паўмесяца запатрабавала яго адстаўкі. Пасля адмовы беларускай федэрацыі яе сяброўства ў міжнароднай арганізацыі было прыпыненае.