У Мінску двое рабочых зноў ледзь не выпалі з будаўнічай калыскі
Сёння прыкладна а 14.00 яны завіслі на вышыні 6 паверха і толькі аператыўныя дзеянні ратавальнікаў з МНС перадухілілі трагедыю.
Рабочыя працавалі на рамонце будынку на вуліцы Беламорская, 16. Машыніст пачаў складваць стралу аўтапад’ёмніка, на якім была замацаваная калыска, каб спусціць людзей уніз. Але страла нечакана перакулілася і два чалавекі завіслі ў моцна нахіленай калысцы на вялікай вышыні.
Супрацоўнікі МНС прыбылі на месца здарэння вельмі аператыўна і ўжо праз 25 хвілінаў вельмі пераляканыя, але не пацярпелыя будаўнікі былі ў бяспецы, паведамляе БЕЛТА. Утрымацца на вышыні ім дапамагла страхоўка, якой яны былі прышпіленыя да калыскі.
На жаль, на мінскіх будоўлях і у часе рамонтных работ на вялікай вышыні падобныя інцыдэнты перыядычна заканчваюцца трагічна.
