Суд над Паўлам Белавусам зрабілі закрытым

Суд над кіраўніком Symbal.by Паўлам Белавусам зрабілі закрытым. Як перадае БЕЛТА, пра гэта хадайнічаў адвакат падсуднага. Паведамляецца, што ён зрабіў гэта "з мэтай прадухілення выдачы інфармацыі, размешчанай у крыніцах, прызнаных экстрэмісцкімі". Сам Павал нібыта не пярэчыў.

Працэс над вядомым дзеячам культуры пачаўся ў Мінскім гарадскім судзе. Белавусу выставілі абвінавачанні па чатырох артыкулах, у тым ліку — у здрадзе дзяржаве. У Следчым камітэце казалі, быццам Белавус "пад выглядам культурна-гістарычнага развіцця ў розных агульнадаступных сацыяльных сетках і на сайтах распаўсюджваў ідэі беларускага нацыяналізму, мэтай якіх з'яўлялася змена дзяржаўнай улады ў Беларусі". Таксама ў СК заяўлялі, нібыта сваімі дзеяннмі менеджар культуры "на працягу дзесяці гадоў ставіў пад пагрозу знешнюю і ўнутраную бяспеку дзяржавы".

Паўлу ставяць у віну, што ён атрымаў з-за мяжы больш за 200 тысяч долараў на культурніцкую дзейнасць. Следства арыштавала яго маёмасць на 50 тысяч рублёў.

Пад вартай Белавус знаходзіцца з 23 снежня 2021 года.