Святлана Ціханоўская адпраўляецца з тыднёвым візітам у ЗША
Святлана Ціханоўская, ілюстрацыйнае фота / Еўрарадыё
17-23 верасня Святлана Ціханоўская наведае ЗША. Пра гэта тг-каналу "Позірк" паведаміў яе галоўны дарадца Франак Вячорка.
У праграме візіту беларускага дэмакратычнага лідара запланаваныя сустрэчы на высокім узроўні з палітыкамі ЗША ды іншых краін, а таксама з беларускай дыяспарай у Нью-Ёрку.
Чакаецца, што падчас візіту Ціханоўская правядзе перамовы з намеснікам дзяржсакратара ЗША па пытаннях грамадзянскай бяспекі, дэмакратыі і правоў чалавека Узрой Зеяй, памочнікам дзяржсакратара па пытаннях Еўропы і Еўразіі Юры Кім, намеснікам адміністратара Агенцтва ЗША па міжнародным развіцці (USAID) Ізабэль Коўлман.
Акрамя таго, у яе запланаваныя сустрэчы з прэзідэнтам Гватэмалы Алехандра Джаматэі і міністрам замежных спраў Фінляндыі Элінай Валтанен. Таксама Ціханоўская прыме ўдзел у мерапрыемствах Генасамблеі ААН.
