У аварыі ў Драгічынскім раёне загінула сям'я з 4 чалавек

У аварыі ў Драгічынскім раёне Брэсцкай вобласці загінулі 4 чалавекі, а сярод іх дзіця. Як паведамляе міліцыя, трагічнае здарэнне адбылося апоўдні 4 ліпеня на 494-м кіламетры аўтадарогі М-10 (мяжа РФ — Гомель — Кобрын). Легкавік SsangYong раптоўна выехаў на паласу сустрэчнага руху, дзе адбылося сутыкненне з фурай Scania. 

Загінулі 45-гадовы кіроўца легкавіка і тры яго пасажыры (маці, жонка і дачка) — жанчыны ва ўзросце 64 і 45 гадоў, а таксама 10-гадовая дзяўчынка.

Крымінальную справу распачалі паводле ч. 3 арт. 317 (парушэнне правілаў дарожнага руху, якое пацягнула па неасцярожнасці смерць дзвюх і больш асоб).