У Беларусі ўжо рыхтуюць пляцоўкі для расійскай стратэгічнай ядзернай зброі
Сяргей Шайгу і Віктар Хрэнін / t.me/modmilby/
У Беларусі ўжо рыхтуюць пляцоўкі для расійскай стратэгічнай ядзернай зброі. Пра гэта сцвярджае міністр абароны РБ генерал-лейтэнант Віктар Хрэнін.
"Калі трэба, у нас будзе і стратэгічная ядзерная зброя, — цытуе словы Хрэніна прэс-служба Мінабароны. — І мы ўжо займаемся падрыхтоўкай існуючых у нас пляцовак. І калі варожая рыторыка працягнецца, гэта будзе наступны крок. На сілу мы будзем адказваць толькі сілай. Па-іншаму на Захадзе не разумеюць".
Пра запланаванае размяшчэнне ў нашай краіне тактычнай ядзернай зброі 25 сакавіка заявіў Уладзімір Пуцін. Пра стратэгічную ядзерную зброю ён нічога не гаварыў. Яе згадаў 31 сакавіка ў "пасланні" Аляксандр Лукашэнка: "Трэба будзе, мы з Пуцным увядзем сюды і стратэгічную ядзерную зброю! Мы ні перад чым не спынімся!" Тады Лукашэнка расказаў, што даручыў "неадкладна аднавіць" пляцоўкі, дзе раней размяшчаліся ракетныя комплексы "Таполя".
Стратэгічная ядзерная зброя адрозніваецца большай магутнасцю ў параўнанні з тактычнай.
