У Польшчы затрымалі грузавы мікрааўтобус, у якім везлі 37 мігрантаў

У Польшчы затрымалі грузавы мікрааўтобус, у якім былі 37 мігрантаў (сярод іх — дзве жанчыны, дзяцей не было). Як паведамляе strazgraniczna.pl, здарэнне адбылося 26 кастрычніка ў раёне горада Бельск-Падляскі. Позна ўвечары патруль паліцыі звярнуў увагу на мікрааўтобус са значна зніжанай падвескай, які рухаўся на захад. Гэта выклікала падазрэнне, яго спынілі і праверылі.

Мігранты, а гэта былі грамадзяне Ірака, паспрабавалі ўцячы, іх спынілі. Яны ламалі мікрааўтобус. Кіроўцам аказаўся 27-гадовы грамадзянін Польшчы. Яму пагражае да 8 гадоў пазбаўлення волі.

Гэта не першае такое затрыманне ў Польшчы грузавога мікрааўтобуса, у якім да мяжы з Германіяй везлі мігрантаў, што нелегальна прыйшлі з Беларусі. У МУС Германіі днямі расказалі, як выглядае схема "беларускага транзіту" мігрантаў.