Вайна на Блізкім Усходзе падзяліла нават супрацоўнікаў McDonalds

Прадстаўніцтвы McDonald's у некаторых мусульманскіх краінах заявілі аб нязгодзе з ізраільскім McDonald's, піша Reuters.

У Ізраілі гэтая сетка хуткага харчаваньня паабяцала бясплатныя пачастункі для ізраільскіх вайскоўцаў. У сваіх акаўнтах у сацсетках сетка абвясціла, што ўжо выдала тысячы бясплатных абедаў для салдатаў ЦАХАЛ і ўсіх, "хто ўдзельнічае ў абароне краіны, бальніц і прылеглых тэрыторый".

Франшызы McDonald's ў Саудаўскай Аравіі, Амане, Кувейце, Аб'яднаных Арабскіх Эміратах, Іарданіі і Турцыі выступілі з заявамі, у якіх адмежаваліся ад дзеянняў сваіх ізраільскіх калегаў.

McDonald's — гэта глабальная сетка, але яе франшызы часта належаць рэгіянальным уладальнікам і працуюць аўтаномна адна ад адной і ўзаемадзейнічаюць з мясцовымі супольнасцямі, калі ў гэтым ёсць патрэба.

"Мы пацвярджаем, што гэта было індывідуальнае рашэнне з іх (ізраільскага) боку, — гаворыцца ў заяве прадстаўніцтва McDonald's у Саудаўскай Аравіі. — Ні глабальны McDonald's, ні мы, ні якая-небудзь іншая краіна не мелі ніякага дачынення да гэтага рашэння, ні прама, ні ўскосна".

Каля 1,3 тыс. ізраільцянаў былі жорстка забітыя палестынскай групоўкай ХАМАС 7 кастрычніка. З тых часоў у выніку ізраільскіх бамбардаванняў у сектары Газа загінула каля 3 тыс.чалавек.