Віцебскую абласную федэрацыю хакея ліквідуюць праз суд

У Віцебску праз суд ліквідуюць абласную федэрацыю хакея, пішуць "Народныя навіны Віцебска".

Адпаведны пазоў падало Галоўнае ўпраўленне юстыцыі Віцебскага аблвыканкама. Пасяджэнне Віцебскага абласнога суда прызначанае на 4 красавіка. Разглядаць справу будзе суддзя Вольга Ільюшонак.

Віцебская абласная федэрацыя хакея была зарэгістраваная як грамадскае аб'яднанне ў 2006 годзе. Традыцыйна на яе чале стаялі начальнікі УУС Віцебскага аблвыканкама. Праўда, цяпер старшынёй з'яўляецца былы рэктар Віцебскага медуніверсітэта Анатоль Шчасны.

Па стане на 1 студзеня 2022 года ў ГА "Віцебская абласная федэрацыя хакея" было 78 чалавек.

Хутчэй за ўсё, арганізацыя трапіла пад "зачыстку" грамадскіх аб'яднанняў, якая ідзе ў Беларусі з ліпеня 2021 года.