Выбары-2025: сабралі крынж ад кандыдатаў у прэзідэнты

Ці чулі пра кіраўніка Рэспубліканскай партыі працы і справядлівасці Аляксандра Хіжняка? А ён, між іншым, цэліць у прэзідэнты!

Хіжняк — дэпутат Мінгарсавета і дырэктар прадпрыемства "БелНДІПгорадабудаўніцтва".

У 2022 годзе Хіжняк змяніў на пасадзе РППС Васіля Задняпранага, які ў 2020 годзе расказаў, што на вуліцы выйшлі зусім не наркаманы і не прастытуткі. Пасля гэтага да партыі з'явіліся пытанні ў прапагандыстаў наконт яе лаяльнасці да ўлады. І партыю чакана "аджалі".

Падчас перарэгістрацыі партый у Беларусі ў 2023 годзе Хіжняк сцвярджаў, што ўсе партыі створаныя для таго, каб "фільтраваць кадры".

У сваім ютуб-канале на 25 падпісчыкаў Аляксандр Хіжняк даў інтэрв'ю нейрасетцы і заявіў, што вырашыў уступіць у партыю, каб "дапамагчы яе рэфармаванню і развіццю".

Хоць у 2023 годзе ў інтэрв'ю прапагандысту АНТ Марату Маркаву Хіжняк расказваў, што ўступіў у РППС — увага! — з-за назвы.

— Я выбраў партыю, як ні дзіўна, ні па медыйнасці, ні па аналізе нейкіх згадак пра яе, я яе выбраў па назве. Вось працы і справядлівасці. Такі вось свядомы выбар па назве.

Як вам такая палітычная пазіцыя ад кандыдата ў прэзідэнты?

Сяргей Сыранкоў. Забараніць шыльды на замежных мовах і аднавіць помнікі Сталіну

Яшчэ адзін кандыдат у прэзідэнты, Сяргей Сыранкоў — старшыня Камуністычнай партыі Беларусі. Тое, што ў 2025 годзе на прэзідэнцкую пасаду вылучаецца камуніст — ужо крынж. Але яго заявы прымушаюць рабіць фэйспалм амаль кожны раз.

Напрыклад, у 2021 годзе, з'яўляючыся дэпутатам Палаты прадстаўнікоў, Сыранкоў заявіў, што Беларусь — гэта Кулікова поле, за якое трэба стаяць гарой. А яшчэ распавёў пра неверагодную падтрымку беларускага рэжыму камуністамі з Бразіліі.

— У падтрымку нашай краіны выступілі камуністы Бразіліі. Упэўнены, што гэтая заява створыць магутны інфармацыйны міжнародны рэзананс і адкрые вочы прадстаўнікам сусветнай супольнасці на працэсы, якія адбываюцца вакол нашай краіны.

Узначаліўшы кампартыю, Сыранкоў пазначыў галоўнай мэтай камуністаў ператварэнне ў галоўную палітычную сілу краіны.

Спытаеце як? А вось так: у сваёй перадвыбарнай праграме сярод іншага Сыранкоў прапануе ўвесці ў Беларусі жорсткую цэнзуру, забараніць шыльды на замежных мовах, аднавіць помнікі Сталіну і называць яго бацькам беларускага народа.

А нядаўна Сыранкоў абурыўся знешнім выглядам беларускай моладзі і заявіў, што "берцы па калена" — гэта прыкмета NATO і УСУ.

Ганна Канапацкая. Крытыка апанентаў і гарачыя фота

Былая дэпутатка Палаты прадстаўнікоў ад АГП (адкуль яе пасля выключылі) і кандыдатка ў прэзідэнты на выбарах 2020 года вырашыла паспытаць шчасця і на гэтых выбарах.

У адрозненне ад папярэдніх кандыдатаў, імя Канапацкай усе чулі даўно. На гэтых выбарах Ганна называе сябе "рэальным апанентам улады".

А ці ў апазіцыі яна? Хутчэй робіць выгляд. Былы кіраўнік АГП Анатоль Лябедзька расказваў, што ў парламент яе не выбіралі, а прызначалі.

На думку Лябедзькі, праблема была ў тым, што "кантрольны пакет кіравання мандатам Канапацкай быў не ў АГП, а ў сілавых структур".

— Аднойчы мы рэкамендавалі ёй прапанаваць сябе ў спікеры, была магчымасць выступіць у прамым эфіры, у прысутнасці дыпламатаў, — узгадвае ён. — Яна з радасцю ўхапілася за гэтую прапанову, але на наступны дзень сказала, што не будзе гэтага рабіць. Прычыну не патлумачыла, а я тады зразумеў, што ў яе ёсць куратары, і апошняе слова за імі, — падае яго словы DW.

Канапацкая рэзка крытыкуе палітвязня Віктара Бабарыку, напрыклад, у 2020 годзе яна параўнала яго з аленем, а яго прыхільнікаў назвала дробнабуржуазнай праслойкай грамадства. А ў нядаўнім допісе ў Instagram так выказалася пра былога банкіра:

— Для мяне як палітыка ён — фінансавы і ідэйны прабацька трагедыі беларускага народа лета-восені 2020 года і ўсёй пралубянскай поскудзі, якая вылупілася з тых падзей і акапалася цяпер у дарагіх офісах Варшавы і Вільні.

Да прыкладу, легендарна крынжовая фатаграфія Ганны ў лазні таксама суправаджалася крытыкай Віктара Бабарыкі.

Былы міліцыянер, Гайдукевіч-малодшы атрымаў у спадчыну ЛДПБ ад свайго бацькі Сяргея Гайдукевіча і ўжо ў 2020 годзе заявіў пра свой удзел у выбарах. Праўда, сабраўшы каля 30 тысяч подпісаў выбарцаў, вырашыў зняцца з гонкі на карысць Лукашэнкі, зрабіўшы сваю магутную прамову.

— Я не магу быць прастытуткай, я буду абараняць свае перакананні. Я лічу, што мы павінны адстаяць сваю краіну і пасля выбараў пачаць рэформы.

У новай электаральнай кампаніі Гайдукевіч усё ж наважыўся ўзяць удзел і быў зарэгістраваны кандыдатам.

— Я хачу шчыра сказаць: вось ненавідзяць ворагі нашага прэзідэнта, цэнтры гэтыя заходнія, таму што ён захаваў краіну, ён захаваў суверэнітэт, умацаваў яе, не прадаў яе. І я хачу, каб іх выварочвала ад кожнага кандыдата ў прэзідэнты, хто ўдзельнічае ў выбарах, — сказаў Гайдукевіч, вылучаючыся ў прэзідэнты.

А ў 2023 годзе ў тэлеграм-канале Гайдукевіча сярод мноства прапагандысцкіх пастоў з'явіўся... дзікпік.

Пост адразу быў выдалены, а Гайдукевіч стаў апраўдвацца, што яго нібыта спрабавалі ўзламаць.

Чый менавіта пеніс быў апублікаваны, незразумела. Але па радзімцы на левай руцэ і падабенстве ногцевых пласцін можна меркаваць, што гэтая "вартасць" менавіта Алега Гайдукевіча.

Перад парламенцкімі выбарамі ў 2024 годзе лідар ЛДПБ зноў выбухнуў пагрозамі ў адрас нядобразычліўцаў і не забыўся згадаць пра свой член.

— Нават палавыя органы мае абмяркоўваюць. Але я ім адказаў: нават мой палавы орган выйграе ў вас выбары! Нават ён! На любых выбарах.

Аляксандр Лукашэнка. Хлусня, хлусня, хлусня

Лукашэнка ідзе на свае ўжо сёмыя выбары запар. Усе папярэднія кампаніі (акрамя 1994-га) ён нібыта выйграў у першым туры.

У 2020 годзе ён казаў, што гэта яго апошні тэрмін і што "пасінелымі пальцамі не будзе трымацца за ўладу".