"Яўрэяў пад кантроль". Лукашэнка — антысеміт, і гэта лёгка даказаць

На заяву Лукашэнкі адрэагавала і кіраўнік МЗС Ізраіля Цыпі Ліўні.

— Сусветныя лідары павінны ўзяць на сябе адказнасць за барацьбу супраць антысемітызму, які падымае выродлівую галаву ў розных частках свету, а не заахвочваць яго.

"Зісер непрыстойна сябе паводзіць"

Выступаючы са штогадовым зваротам да парламента ў 2015 годзе, Лукашэнка зноў непрыхільна выказаўся пра яўрэяў. У прыватнасці пра заснавальніка партала tut.by Юрыя Зісера за тое, што журналісты выдання раскрытыкавалі ўказ Лукашэнкі аб увядзенні падатку для грамадзян, якія працуюць менш за 183 дні на год.

— Сямён Барысавіч, Зісер непрыстойна сябе паводзіць, я гляджу. Я ж вас год таму прасіў усіх яўрэяў у Беларусі ўзяць пад кантроль, — сказаў Лукашэнка кіраўніку сталічнай вобласці Шапіру.

— Працуем над гэтым, — усміхнуўся Шапіра Лукашэнку.

Пазней старшыня Саюза беларускіх яўрэйскіх грамадскіх арганізацый Барыс Герстэн абараніў Лукашэнку і апраўдаў яго словы эмацыйнасцю.

— Не думаю, што гэта нейкія ягоныя перакананні, бо насамрэч, паводле ўчынкаў, якія мы бачым, яны паказваюць яго як вельмі талерантнага чалавека. Насамрэч мы не бачым тут у Беларусі праяваў нейкага антысемітызму.

Сам Юрый Зісер тады выказаў занепакоенасць такімі заявамі.

Пасля гэтага выпадку праваабаронца Таццяна Равяка напісала ў Генпракуратуру Беларусі з просьбай праверыць, ці не змяшчаецца ў словах Лукашэнкі прыкмет злачынства, прадугледжанага артыкулам 130 Крымінальнага кодэкса Беларусі (распальванне расавай, нацыянальнай або рэлігійнай варожасці або варажнечы).

У пракуратуры чакана адказалі, што ў выказванні "звестак аб парушэнні заканадаўства не змяшчаецца".

"Яўрэі кіравалі светам"

Падчас свайго выступу на Кургане Славы з нагоды Дня Незалежнасці ў 2021 годзе Лукашэнка параўнаў памяць пра Другую сусветную вайну з памяццю пра Халакост і заявіў, што перад яўрэямі, якія "кіравалі светам і СМІ", "схіляецца ўвесь свет".

Ён казаў пра ўдзел беларусаў у барацьбе з нацыстамі падчас Другой сусветнай вайны і прапанаваў пачаць расследаванне па факце "генацыду беларускага народа".

— Яўрэі ж здолелі гэта даказаць. Увесь свет сёння схіляецца перад імі, нават баяцца пальцам на іх паказаць, а мы такія талерантныя, такія добрыя, нікога не хацелі пакрыўдзіць. Даскакаліся да таго, што нас пакрыўдзілі, — сказаў Лукашэнка.

У МЗС Ізраіля палічылі гэтыя выказванні Лукашэнкі непрымальнымі.

Армяне разумныя, таму што там няма яўрэяў

У снежні 2023 года ў Санкт-Пецярбургу на пасяджэнні Вышэйшага Еўразійскага эканамічнага савета Лукашэнка вырашыў "пахваліць" армян. І чамусьці прывёў у прыклад яўрэяў.

Лукашэнка расказваў журналістам пра становішча Арменіі, якая спрабуе накіраваць свае сілы на наладжванне стасункаў з Захадам.

— Калі Арменія захоча памерці эканамічна — мы можам яе згубіць. Але я не думаю, што армяне — дурныя людзі. Армяне — разумныя людзі. Бо там няма ніводнага яўрэя. Ведаеце, чаму ў Арменіі няма яўрэяў? Таму што армяне — самыя разумныя людзі, — заявіў Лукашэнка.

Пры гэтым ізраільскае выданне 7kanal.co.il адзначае, што ў Арменіі ёсць яўрэйская абшчына, у якой пражывае каля 400 чалавек, абвяргаючы словы Лукашэнкі.

"Яўрэі-карупцыянеры"

У траўні 2024 года на нарадзе Лукашэнкі з урадам, прабіраючы інспектара па Віцебскай вобласці Ігара Брылу, які аказаўся замяшаным ў карупцыйным скандале, ён зноў згадаў яўрэяў.

Лукашэнка адзначыў, што фігурантамі справы з'яўляюцца яшчэ 30 чалавек. І дадаў наступнае.

— Вы мяне прабачце, я не антысеміт, але больш за палову яўрэяў. Гэта што ў нас асаблівае, прывілеяванае становішча займаюць, што яны крадуць і не думаюць пра сваю будучыню... Усе аднолькавыя перад законам. І яўрэі, і беларусы, і ўкраінцы, рускія і палякі.

Агенцтва JNS паведамляла, што кіраўнік МЗС Ізраіля Ісраэль Кац называў выказванні прэзідэнта Беларусі Аляксандра Лукашэнкі аб яўрэях, замяшаных у карупцыі ў рэспубліцы, непрымальнымі, абуральнымі і антысеміцкімі.

Стаўленне Лукашэнкі да вайны Ізраіля з ХАМАС

Беларуская прапаганда з першых дзён вайны выступала з антыізраільскага боку.

Напрыклад, "Минская правда" напісала, што "перамога Палестыны — гэта перамога Масквы і Мінска", хоць пазней матэрыял быў выдалены.