З Беларусі ўцёк следчы па асабліва важных справах з Лунінца — "Медыя-Палессе"
Сяргей Пахолак / media-polesye.by
З Беларусі спешна выехаў 45-гадовы следчы па асабліва важных справах з Лунінца Сяргей Пахолак, піша "Медыя-Палессе".
Як даведаліся журналісты, прычын уцёкаў некалькі. Па-першае, жонка следчага трапіла пад крымінальны пераслед. Яна працавала спецыялістам інжынерна-аэрадромнай службы вайсковай часці 65408, дзе базуецца расійская авіятэхніка. Жанчыну затрымалі за перадачу даных сястры, жыхарцы ЗША. Па-другое, падчас праверкі выявіліся агрэхі ў працы і самога Пахолка.
Малодшы сын следчага напісаў аднакласнікам, што ў гімназію больш не вернецца.
Следчым Пахолак працаваў з 2013 года. У 2020-м пасля адной з публікацый "Медыя-Палессе", якая не спадабалася Пахолку, ён пагражаў рэдактару закрыццём партала, а яго жонка выказвала свой гнеў у каментарах у сацсетках.
Дарэчы, нядаўна сышоў у адстаўку начальнік Лунінецкага раённага аддзела Следчага камітэта Андрэй Лукашэвіч.
