З Еўропы Лукашэнку павіншаваў толькі Мальтыйскі ордэн

3 ліпеня ў Рэспубліцы Беларусь адзначаецца Дзень незалежнасці. Прэс-служба Аляксандра Лукашэнкі паведамляе, што ён атрымаў віншаванні ад кіраўніцтва Расіі, Венесуэлы, Нікарагуа, некалькіх краін Азіі і Афрыкі. З Еўропы Лукашэнку павіншаваў толькі Мальтыйскі ордэн. Ён і раней не звяртаў увагу на рэпрэсіі ў Беларусі і адсутнасць легітымнасці ў кіраўніка — пасля падзей 2020-га амбасадар уручаў Аляксандру Лукашэнку даверчыя граматы.

Дзень незалежнасці Беларусі з 1991-га да 1996 года адзначаўся 27 ліпеня. Пасля рэферэндума 1996-га свята сталі адзначаць 3 ліпеня, у дзень вызвалення Мінска ад нямецка-фашысцкіх захопнікаў. 25 сакавіка беларускія патрыёты адзначаюць угодкі абвяшчэння ў 1918 годзе дзяржаўнай незалежнасці Беларускай Народнай Рэспублікі.

У тг-канале Еўрарадыё якраз праходзіць апытанне наконт таго, у які дзень трэба адзначаць Дзень незалежнасці Беларусі.