За "ўдзел у беспарадках" у Магілёве судзяць адразу пяць чалавек

У судзе Ленінскага раёна Магілёва за ўдзел у "дзеяннях, якія груба парушаюць грамадскі парадак" (ч. 1 арт. 342 КК) судзяць адразу пяць чалавек.

Як паведамляюць мясцовыя праваабаронцы, гаворка ідзе пра Андрэя Цімоніна, Валерыя Іўчына, Міхаіла Пішчалу, Святлану Котаву і Дзяніса Котава. Працэс вядзе Наталля Панасенка. Гэта першы выпадак у Магілёве, калі людзей так масава судзяць паводле "народнага артыкула". Судовыя пасяджэнні адбыліся 7 і 10 чэрвеня.

Як адзначае MAYDAY, аднаго з падсудных — Андрэя Цімоніна — сёлета ў студзені судзілі паводле адміністрацыйнага артыкула за "распаўсюд экстрэмісцкіх матэрыялаў" (арт. 19.11 КаАП).

Валерый Іўчын хутчэй за ўсё працаваў на Магілёўскім аддзяленні чыгункі. Іншых падрабязнасцяў пра справу і асобы падсудных няма.