Заўзятары БАТЭ хочуць разабрацца, куды пайшлі квіткі на матчы Лігі чэмпіёнаў

Заўзятары футбольнага клуба БАТЭ хочуць разабрацца, куды зніклі квіткі на хатнія матчы клуба ў Лізе чэмпіёнаў. Як паведамляла Еўрарадыё, продаж квіткоў стартаваў у панядзелак а 15-й, а ўжо праз гадзіну клуб афіцыйна заявіў, што ўсе квіткі распрададзеныя. Тым часам у сацсетках сталі з'яўляцца прапановы ад перакупшчыкаў квіткоў.

Сайт by.tribuna.com апублікаваў ліст аднаго з заўзятараў да старшыні праўлення БАТЭ Анатоля Капскага. Мужчына спрабаваў купіць квіткі на гульні ўлюбёнай каманды, але яны скончыліся праз 40 хвілінаў пасля таго, як трапілі ў вольны доступ.

Заўзятар пытаецца, як можна было за 40 хвілінаў паспець прадаць больш за 10 тысяч квіткоў. І гэта пры тым, што іх прадавалі не больш як па два ў адны рукі.

Ён пытаецца ў  Капскага, колькі квіткоў было прададзена па безнаяўным разліку (так звычайна закупляюцца прадпрыемствы і арганізацыі) і колькі квіткоў трапіла ў вольны продаж 14 верасня а 15-й гадзіне. Ён адзначае, што гэтае пытанне хвалюе многіх заўзятараў.

Фота: football.by