Стала вядома пра яшчэ адзін суд над заўзятарам, які не падняўся падчас гімна

Стала вядома пра яшчэ адзін суд над футбольным заўзятарам, які не падняўся падчас выканання гімна Рэспублікі Беларусь (дагэтуль былі вядомыя не менш за два выпадкі). Пра яго ў інтэрв'ю газеце "Вячэрні Гродна" распавяла суддзя Ленінскага раённага суда Гродна Алена Пятрова. Паводле яе слоў, гэты выпадак адбыўся ў Гродне ў 2023 годзе. "Мінчук, знаходзячыся на трыбуне стадыёна, падчас афіцыйнай цырымоніі на спартыўным матчы слухаў дзяржаўны гімн Беларусі седзячы, тым самым парушыў устаноўленыя заканадаўствам патрабаванні", — кажа Пятрова.

У выніку мужчыну судзілі па артыкуле 24.54 КаАП за "незаконныя дзеянні ў адносінах да дзяржаўных сімвалаў Рэспублікі Беларусь" і аштрафавалі на 15 базавых велічынь (летась гэта былі 555 рублёў).

Пра тое, што ў Беларусі пачалі штрафаваць за тое, што не ўстаў падчас выканання дзяржаўнага гімна, стала вядома ў 2021-м. На 290 рублёў аштрафавалі мужчыну, які быў на трыбуне на футбольным матчы ў Слоніме. Праўда, на судзе заўзятар сказаў, што перад матчам глядзеў відэа на тэлефоне, з-за чаго ўстаў не адразу з уключэннем гімна, а прыкладна праз 15 секунд, і гімн яшчэ гучаў. Але на суд гэтае тлумачэнне не паўплывала.

У 2022-м суд Ленінскага раёна Гродна аштрафаваў дырэктара аднаго з прадпрыемстваў на 480 рублёў. Ён застаўся сядзець на месцы, калі на футбольным матчы "Нёмана" і БАТЭ ўключылі гімн.