ЗША пагражаюць новымі санкцыямі, калі Беларусь працягне падтрымку Расіі ў вайне
Белы Дом / pixabay.com
ЗША могуць увесці новыя санкцыі супраць беларускага рэжыму, калі ён працягне падтрымліваць Расію ў вайне супраць Украіны. Пра гэта заявіў спікер Дзярждэпартамента Нед Прайс.
Злучаныя Штаты, падкрэсліў ён, адсочваюць супрацоўніцтва паміж Мінскам і Масквой, і рэжым Лукашэнкі ўжо трапляе пад санкцыі.
"Мы будзем шукаць дадатковыя спосабы прыцягнуць Беларусь да адказнасці, калі яна будзе працягваць супрацоўнічаць з Крамлём у гэтай жорсткай вайне", — падкрэсліў прадстаўнік Дзярждэпу.
Прайс мяркуе, што рэжым Лукашэнкі фактычна саступіў Расіі суверэнітэт Беларусі.
Пра саўдзел Беларусі ў вайне супраць Украіны казала і прэс-сакратар Белага дома Карын Жан-П'ер. Па яе словах, якія пераказвае hromadske.ua, Злучаныя Штаты даўно ўстурбаваныя роляй Беларусі ў расійскай агрэсіі.
"Беларусь спрыяла вайне Расіі супраць Украіны, калі аказала падтрымку Расіі і дазволіла выкарыстоўваць сваю тэрыторыю як плацдарм для расійскіх войскаў", — патлумачыла яна.
