Зяленскага папрасілі легалізаваць аднаполыя шлюбы, але гэтаму перашкаджае вайна

"У сучасным свеце ўзровень дэмакратычнасці грамадства вымяраецца ў тым ліку праз палітыку дзяржавы, накіраваную на забеспячэнне роўных правоў для ўсіх грамадзян. Кожны грамадзянін з'яўляецца неаддзельнай часткай грамадзянскай супольнасці, на яго распаўсюджваюцца ўсе правы і свабоды, замацаваныя ў Канстытуцыі Украіны", — адзначыў у сваім адказе прэзідэнт Украіны.

Аднак Зяленскі нагадаў: паводле Канстытуцыі, шлюб заключаецца паміж мужчынам і жанчынай. "Ва ўмовах ваеннага або надзвычайнага становішча Канстытуцыя Украіны не можа быць змененая", — дадаў ён.

Зрэшты, "абыходны шлях" знойдзены: Зяленскі прапанаваў зрабіць першы крок у бок легалізацыі. Ён звярнуўся да ўрада з просьбай распрацаваць варыянты рашэнняў праблемы — тым больш, што раней ужо абмяркоўвалася пытанне легалізацыі ва Украіне грамадзянскага партнёрства.

Грамадзянскае партнёрства легалізаванае ў шэрагу краін, дзе пакуль не дазволеныя аднаполыя шлюбы. Гэты інстытут дазваляе аднаполым парам мець больш правоў: напрыклад, на сумесную маёмасць, магчымасць пісаць завяшчанне адно на аднаго і наведваць партнёра, калі ён (яна) трапляе ў бальніцу.