Абвешчаны прысуд траім мінчукам, якія скінулі з балкона дзверы на міліцыянтаў
Траіх мінчукоў, якія скінулі з балкона дзверы на міліцыянтаў, асудзілі да двух і трох гадоў калоніі, паведамляюць праваабаронцы.
Трое жыхароў сталіцы 11 жніўня мінулага года падчас акцыі пратэсту ўбачылі, як супрацоўнікі міліцыі затрымлівалі і збівалі мужчыну ў двары на "Каменнай Горцы". У адказ на гэта яны скінулі драўляныя дзверы з балкона 11-га паверху на міліцыянтаў.
Ніхто тады не пацярпеў, аднак на судзе пацярпелымі выступалі два супрацоўнікі, верагодна, са змененымі прозвішчамі — Іваноў і Пятроў. Маральную і матэрыяльную шкоду яны не заяўлялі.
Суддзя Дзмітрый Лукашэвіч асудзіў Яўгена Коржаля і Цімафея Мажанкова да двух гадоў калоніі агульнага рэжыму, а Аляксея Ігнаценку — да трох гадоў і аднаго месяца калоніі агульнага рэжыму. Менавіта такое пакаранне запатрабавала дзяржабвінаваўца Аксана Саковіч.
