500 тысяч жыхароў Мінска засталіся без пітной вады
Зноў праблемы з вадой / Ілюстрацыйнае фота з архіва Еўрарадыё
Адбылася аварыя ў сістэме пітнога водазабеспячэння Мінска. Як паведамляюць сталічныя камунальнікі, яна адбылася позна ўвечары 6 верасня і закранула Першамайскі, Партызанскі і Савецкі раёны сталіцы. Сцвярджаецца, што "непаладкі ліквідаваны, прама цяпер праводзіцца прамыванне сетак". Пры гэтым "магчыма пагаршэнне якасці водазабеспячэння на названых адміністрацыйных тэрыторыях".
Мінскі гарадскі цэнтр гігіены і эпідэміялогіі не рэкамендуе выкарыстоўваць ваду з-пад крана для падрыхтоўкі ежы, "пітных мэтаў" і асабістай гігіены. Мінчукоў са згаданых раёнаў заклікаюць выкарыстоўваць прывазную або бутыляваную ваду.
У трох раёнах жыве каля 500 тысяч чалавек. Гэта каля чвэрці насельніцтва Мінска.
Буйная аварыя адбылася ў Мінску ў чэрвені 2020 года. У Фрунзенскім і Маскоўскім раёнах з кранаў пайшла брудная вада з непрыемным пахам. Некалькі дзён яе забаранялі піць.
