Аксёнаў заявіў, што ў Крыме растуць праўкраінскія настроі
Кіраўнік расійскай акупацыйнай адміністрацыі Крыма Сяргей Аксёнаў заявіў, што ў Крыме растуць праўкраінскія настроі. Ён запісаў відэазварот, у якім пагражае крымінальным пакараннем крымчанам, якія "выходзяць на публічныя мерапрыемствы, спяваюць гімн Украіны і выкрыкваюць нацыяналістычныя лозунгі".
Аксёнаў кажа, што апошнім часам падобныя відэазапісы сталі з'яўляцца ў інтэрнэце. "На грамадскіх мерапрыемствах скандуюць нацыяналістычныя лозунгі, спяваюць гімны, асабліва ў перыяд спецыяльнай ваеннай аперацыі, — цытуе словы Сяргея Аксёнава "Бі-Бі-Сі". — Гэта будзе карацца ў крымінальным парадку — і арганізатары, і ўдзельнікі".
Кіраўнік адміністрацыі пагражае таксама звальненнем з працы або стратай права займацца бізнесам у Крыме. "Не любіце нашу краіну — едзьце ў тую, якую любіце", — заявіў ён.
Праўкраінскія настроі ў Крыме ўзмацняюцца і становяцца ўсё больш дэманстрацыйнымі на фоне поспехаў украінскіх войскаў на фронце, якія вызвалілі Харкаўскую вобласць і вызваляюць Херсоншчыну.
Украінскі Крым знаходзіцца пад расійскай акупацыяй з 2014 года. Украінскі прэзідэнт Уладзімір Зяленскі неаднаразова заяўляў, што ўся акупаваная Расіяй тэрыторыя Украіны будзе вызвалена і раіў расійскім вайскоўцам бегчы з украінскай зямлі.
