Аляксандр Глеб не паехаў у Лондан на матч "Арсенал" — БАТЭ

Зорная кар'ера Аляксандра Глеба шчыльна звязаная з БАТЭ і "Арсеналам". Выступаючы за барысаўчан, ён стаў чэмпіёнам Беларусі і звярнуў на сябе ўвагу футбольных скаўтаў. Праз пяць гадоў, пагуляўшы ў "Штутгарце", Глеб пераехаў у Лондан, дзе стаў адным з ключавых гульцоў каманды Арсена Венгера.

З таго часу прайшло больш за 10 гадоў. Сёлета 36-гадовы Глеб думае пра завяршэнне кар'еры. Даведаўшыся, што сапернікам БАТЭ па групе ў Лізе Еўропы стане "Арсенал", футбаліст папрасіўся вярнуцца ў склад барысаўскага клуба.

"Пра гэта пагаварыў і з Ермаковічам (галоўным трэнерам БАТЭ. — Еўрарадыё), прасіў даць мне магчымасць выйсці ў гульні з "Арсеналам" хоць бы на замену і тым самым прыгожа завяршыць кар'еру. Я не збіраўся перашкаджаць клубу вырашаць пастаўленыя задачы. Хоць, думаю, што я мог бы ім яшчэ і дапамагчы годна выглядаць у Лізе Еўропы", — распавёў Глеб.

Гэта сапраўды магло б стаць прыгожым завяршэннем кар'еры, але барысаўскі клуб адмовіў паўабаронцу. У выніку Глеб будзе назіраць за матчам дзвюх "сваіх" каманд па тэлевізары.