АПК папярэджвае пра фэйкавы збор даных на "пашпарт Новай Беларусі"
Фэйкавая рассылка наконт "пашпарта Новай Беларусі" / t.me/BelarusiSvet
Беларусам сталі прыходзіць фэйкавыя электронныя лісты ад імя "валанцёрскай службы праекта новага нацыянальнага пашпарта Беларусі". У іх просяць пакінуць персанальныя даныя дзеля "невялікага сумоўя". Пра фэйкавую рассылку папярэджвае Аб'яднаны Пераходны кабінет (АПК).
Прадстаўніцтва па замежных справах АПК заяўляе, што мэта гэтай рассылкі — сабраць персанальныя даныя беларусаў.
Праект новага нацыянальнага пашпарта Беларусі не мае ніякай валанцёрскай службы. У АПК не плануюць збіраць праз інтэрнэт ніякія персанальныя звесткі і не будуць звязвацца праз Gmail.
"Калі ў вас ёсць сумневы, вы заўсёды можаце звярнуцца асабіста ў Прадстаўніцтва па замежных справах праз нашыя афіцыйныя старонкі ў Facebook, Instagram ці напісаць у Telegram, кіруючыся прынцыпамі лічбавай бяспекі, альбо напісаць у афіцыйны чат-бот Кабінета", — заяўляюць у Прадстаўніцтве па замежных справах.
Дзяржаўныя прапагандысты напярэдадні паказалі на БТ сюжэт, як ім нібыта ўдалося атрымаць пашпарт Новай Беларусі. Можна меркаваць, што рассылка лістоў і гэты тэлесюжэт — элементы адной аперацыі спецслужбаў Лукашэнкі.
