Балгарыя высылае двух беларусаў за дзейнасць супраць нацыянальнай бяспекі
![Яўген Павяльчук](/sites/default/files/styles/gallery_main/public/2023-09/pavialczuk-2209.jpg.webp?itok=nNCXGyFz)
Яўген Павяльчук / Гродзенская епархія БПЦ
Балгарыя выслала двух грамадзян Беларусі і аднаго расіяніна. Яны пазбаўленыя права жыхарства і ім забаронены ўезд у краіну. Як паведаміла 21 верасня Агенцтва нацыянальнай бяспекі Балгарыі, гаворка ідзе пра "грамадзяніна Расіі Н.З. і грамадзян Рэспублікі Беларусі Е.П. і В.Б".
Гэтыя меры спецслужба тлумачыць іх дзейнасцю супраць нацыянальнай бяспекі і інтарэсаў Балгарыі. Па звестках ведамства, яны займаліся "рэалізацыяй розных элементаў гібрыднай стратэгіі РФ у мэтанакіраваным уздзеянні на грамадска-палітычныя працэсы ў Балгарыі на карысць расійскіх геапалітычных інтарэсаў".
Афіцыйная прадстаўніца расіяйкага МЗС Марыя Захарава паведаміла, што гаворка ідзе пра настаяцеля Падвор’я Рускай праваслаўнай царквы ў Сафіі архімандрыта Васіяна (Мікалай Змееў), а таксама сакратара падвор’я протаіерэя Яўгена і супрацоўніка храма.
На афіцыйным сайце БПЦ 20 лістапада 2020 года паведамлялася, што сакратаром прадстаўніцтва Маскоўскага патрыярха пры Балгарскім патрыярху прызначаны клірык Мінскай япархіі протаіерэй Яўген Павяльчук. Верагодна, ён і маецца на ўвазе пад ініцыяламі "Е.П.".
Супрацоўнік царквы з ініцыяламі "В.Б.", магчыма, — мінчук Уладзімер Банько. На сваёй старонцы ў Фэйсбуку ён пазначыў, што працуе ў рускай праваслаўнай царкве ў Сафіі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.