Беларуска спыталася ў "Што? Дзе? Калі?" пра прадпрымальнікаў, якіх "можна даіць"
Алеся Арцюхоўская з Віцебска выйграла ў знатакоў у фінале расійскай версіі інтэлектуальнай гульні "Што? Дзе? Калі?". Яе пытанне прагучала пры ліку 2:0 на карысць каманды Балаша Касумава і прынесла першае ачко тэлеглядачам.
Гульня мусіла адбыцца ў ноч на 26 снежня, але праз жалобу, абвешчаную пасля падзення расійскага Ту-154, яе перанеслі на тыдзень. У выніку фінал "Што? Дзе? Калі?", на які акрамя знатакоў запрасілі і тэлеглядачоў, прайшоў у ноч на 3 студзеня.
Пытанне гучала так:
"Адны бачаць у ім ваўка, якога неабходна забіць. Іншыя — карову, якую можна бясконца даіць. І няшмат хто бачыць у ім таго, кім ён ёсць насамрэч — каня, які цягне колы. Пра каго так казаў Уінстан Чэрчыль?"
За хвіліну знатакі прыдумалі некалькі вартых версіяў. На пытанне адказваў Дзмітрый Аўдзеенка. Ён сказаў, што гаворка ідзе пра героя літаратурнага твора, прычым хутчэй за ўсё — пра галоўнага злачынцу. Але дакладны адказ быў — "прадпрымальнік". Вядучы праграмы пракаментаваў, што гэтае пытанне, відаць, навеяна жыццём.
Алеся Арцюхоўская скончыла Фармацэўтычны факультэт медыцынскага ўніверсітэта ў Віцебску. Яна распавяла, што ў яе з мужам праходзіць спаборніцтва: у каго больш пытанняў возьмуць на "Што? Дзе? Калі?". Пакуль што яна выйграе: у яе ўзялі адно пытанне, а ў Міхаіла Арцюхоўскага пакуль што — ніводнага.
Гульня скончылася драматычна: пры ліку 5:5 знатакі не здолелі адказаць на досыць складанае пытанне, і тэлегледачы перамаглі. Пасля гульні яны падзялілі паміж сабой прызавы фонд гульні, які склаў блізу 2,4 млн расійскіх рублёў. На кожнага прыйшлося па 412 тысяч 514 рублёў, ці каля $6,7 тысяч.
