Брэсцкае "Дынама" пералічыла "Нёману" грошы за Паўла Савіцкага?
Брэсцкае "Дынама" пералічыла гродзенскаму "Нёману" грошы за нападаючага Паўла Савіцкага, інфармуе партал TUT.by. Пакуль невядома, ці гэта ўся сума (265 тысяч долараў), ці яе частка. Як вядома, таленавіты футбаліст перайшоў у "Дынама" ў канцы 2017 года ў якасці свабоднага агента. Пазней "Нёман" запатрабаваў кампенсацыю за яго падрыхтоўку, спасылаючыся на дакументы федэрацыі. Першапачаткова гэта былі 600 тысяч долараў. Пасля сума зніжалася — да $265 тысяч. Аднак брэсцкае "Дынама" плаціць адмаўлялася, спрабавала шукаць праўду ў розных судах, але справу не прынялі да разгляду. У выніку Беларуская федэрацыя футбола наклала на клуб санкцыі: было забаронена рэгістраваць новых футбалістаў, узнікла пагроза, што каманду не дапусцяць да ўдзелу ў чэмпіянаце.
12 сакавіка з'явіўся відэазварот кіраўніка клуба, бізнесмена Аляксандра Зайцава. Ён супакоіў балельшчыкаў, сказаў, што даў каманду "пайсці на дыялог з футбольным клубам "Нёман". "Федэрацыя нас прымушае заплаціць за гэтага гульца, пагражаючы не дапусціць клуб да ўдзелу ў чэмпіянаце [Беларусі] 2019 года, — гаварыў Зайцаў. — У бліжэйшыя дні ўсё вырашыцца... Мы выканаем незаконныя патрабаванні, з нашай кропкі гледжання... Але застаецца шэраг пытанняў да федэрацыі футбола, на якія мы не атрымалі адказу... Я ўпэўнены, што горад Брэст і ўся наша вобласць не застануцца без футбола. Тым больш у год тысячагоддзя горада. Для мяне ў прыярытэце застаецца чалавек, просты балельшчык...".
Паўлу Савіцкаму 24 гады. Летась ён стаў найлепшым бамбардзірам чэмпіянату Беларусі, забіў 15 галоў. Савіцкі — гулец нацыянальнай зборнай нашай краіны.
