Цана на газ, адзіная валюта і крэдыт — пра што размаўлялі Пуцін і Лукашэнка

Цана на расійскі прыродны газ для Беларусі ў 2022 годзе застанецца на ранейшым узроўні — $128,5 за тысячу кубоў, заявіў прэзідэнт РФ Уладзімір Пуцін на прэс-канферэнцыі па выніках сустрэчы з Аляксандрам Лукашэнкам.

Яшчэ год таму Мінск лічыў гэтую цану несправядлівай. У маі 2020 года на сустрэчы з тагачасным прэм'ерам Сяргеем Румасам Лукашэнка настойваў на больш нізкім кошце.

"Учора я атрымаў інфармацыю, што Расія прадае прыродны газ у Еўропе ў гэты няпросты час да $ 70: $ 65-68, але ніяк не $ 127, як для Беларусі. Якая тут сітуацыя і абстаноўка, на што мы можам разлічваць у будучыні?"— пытаўся Лукашэнка.

Пуцін на ўчорашняй прэс-канферэнцыі таксама паведаміў, што Расія і Беларусь маюць намер да 1 снежня 2023 года падпісаць дамову аб стварэнні аб'яднанага рынку газу. У перспектыве таксама падпісанне дамоваў аб адзіных рынках нафты і электраэнергіі.

Адзінай валюты пакуль не будзе

Аб адзінай валюце пакуль казаць рана, заявіў па выніках перамоваў Пуцін. Спачатку, па яго словах, трэба адладзіць адзіную макраэканамічную палітыку. Як стала вядома, бакі дамовіліся, што Цэнтрабанк Расіі і Нацбанк Беларусі "павінны гарманізаваць грашова-крэдытную палітыку, дамагчыся інтэграцыі плацежных сістэм, інфармацыйнай бяспекі ў фінансавай сферы".

"Гэта ўсё ў картах ёсць, у гэтых [саюзных] праграмах. Там, сапраўды, відаць будзе", — сказаў Пуцін.

Лукашэнка таксама не выключыў вяртання да тэмы адзінай валюты. Праблема застаецца ў тым, дзе будзе эмісійны цэнтр. Але пры гэтым ён разлічвае, што "нават у нашу бытнасць мы яшчэ з прэзідэнтам [Пуціным] вырашым гэтую праблему".

Доступ да дзяржзакупак

Па выніках сустрэчы таксама стала вядома, што Мінск і Масква дамовіліся аб пераходзе да адзінай прамысловай палітыцы і агульнага доступу да дзяржзакупак і дзяржзамове.

"Мы доўга спрачаліся. Трэба сказаць, што беларускія партнёры складаныя перагаворшчыкі. Але паступова ўсё раскладваецца па палічках", — пракаментаваў гэтую частку перамоваў Пуцін.

Яшчэ са значных вынікаў — узгоднены ўсе 28 саюзных праграм (дарожных карт), Масква выдзеліць Мінску да канца 2022 года крэдытаў на агульную суму каля $630-640 млн. Абмяркоўваецца візіт Пуціна ў Мінск гэтай восенню. Даты пакуль няма. 

Пуціна яшчэ спыталі аб міграцыйным крызісе на мяжы Беларусі з краінамі ЕС. Ён сказаў, што Масква не мае намеру ўмешвацца ў гэтую сітуацыю, паколькі гэта яе не тычыцца. Хоць калегі з краін Еўрасаюза яго і прасілі паўплываць на Мінск.

"Адказ вельмі просты: нас не тычыцца, гэта не наша мяжа, гэта мяжа Рэспублікі Беларусь і дзяржаўная мяжа Літвы і Польшчы", — сказаў расійскі прэзідэнт.

Гэта быў пяты візіт Лукашэнкі ў Расію з пачатку года. Сустрэча з Пуціным у гэты раз доўжылася больш за 4 гадзіны.