Чаму прэм’ер-міністра не было ў парламенце, калі дэпутаты прымалі бюджэт?
Цягам двух дзён, 3 і 5 кастрычніка, дэпутаты Палаты прадстаўнікоў прымаюць бюджэт на наступны год. Але ні ў першы, ні ў другі дзень у Авальнай зале так і не з’явіўся прэм’ер-міністр Кабякоў. Няўжо прэм’еру нецікава, як будзе прымацца бюджэт краіны?
“На “нулявым чытанні” прэм’ер прысутнічаў, а падчас першага мы былі ў Малдове, — тлумачыць Еўрарадыё прэс-сакратар прэм’ер-міністра Уладзіслаў Сычэвіч. — А наконт сёння — вы патэлефануйце ў Палату прадстаўнікоў і пацікаўцеся, ці запрашалі яны сёння кіраўніка ўрада. Што да чальцоў урада, то былі, напэўна, бо я не ведаю, міністры ці намеснікі міністраў — звычайна яны там прысутнічаюць. А наконт віцэ-прэм’ераў… А ці гэта прапісана, што яны абавязаныя прысутнічаць?”
Сапраўды, і ў першы, і ў другі дзень чытання бюджэту “міністэрская ложа” — амаль пустая. Больш за тое, калі ў першы дзень Авальную залу наведалі міністр фінансаў Амарын, прадстаўнікі Міністэрства па падатках і зборах, міністр працы і сацыяльнай абароны Шчоткіна, віцэ-прэм’ер Калінін, прадстаўнікі яшчэ пары-тройкі міністэрстваў, то на другое чытанне ў парламент прыйшлі толькі міністр фінансаў і прадстаўніца падатковага міністэрства.
Міністра па надзвычайных сітуацыях у разлік не бяром: ён выступае з дакладам па сваім пытанні і сыходзіць, нават не дачакаўшыся пачатку абмеркавання законапраектаў з “бюджэтнага пакета”.
Можа, сапраўды ўся справа ў тым, што прэм’еру забыліся даслаць запрашэнне на пасяджэнне парламента па бюджэце?
“Ніколі мы прэм’еру такіх запрашэнняў не дасылалі, — нават здзіўляюцца майму пытанню ў прэс-службе Палаты прадстаўнікоў. — Палічыў бы патрэбным — прыйшоў бы”.
Тым больш што парламент і ўрад знаходзяцца ў адным будынку. Каб трапіць у Авальную залу, прэм’еру нават на двор выходзіць не трэба.
На сайце Савета міністраў няма ніякай інфармацыі пра тое, чым сёння займаецца прэм'ер...
Фота Змітра Лукашука
