Чаргінец не здолеў адказаць, калі Арлоў прапанаваў назваць вуліцу ў гонар Кубэ

Старшыня Саюза пісьменнікаў Беларусі Мікалай Чаргінец не змог назваць кнігу, у якой Уладзімір Арлоў патрабуе назваць мінскую вуліцу імём гаўляйтара Вільгельма Кубэ.

Нагадаем, 11 ліпеня на прэс-канферэнцыі ў Мінску журналісты вырашылі абмеркаваць з Мікалаем Чаргінцом рэкамендацыі для школьнай праграмы па беларускай літаратуры, якія штогод складае старшыня Саюза пісьменнікаў. Ён адказаў, што ніколі не парэкамендуе ўключыць у праграму творы Уладзіміра Арлова і Васіля Якавенкі, якія ўслаўляюць фашызм. Маўляў, Арлоў нават прапанаваў назваць вуліцу ў гонар Кубэ, кіраўніка Беларусі ў гады нацысцкай акупацыі.

"Салідарнасць" піша, што ў Чаргінца запыталіся, на падставе чаго ён зрабіў такія заявы. Ён адказаў, што абодва пісьменніка выказваліся з нагоды Кубэ ў літаратурных творах.

Адказваючы на ​​пытанне, у якім менавіта творы Уладзіміра Арлова прапануецца назваць вуліцу імём Кубэ, Чаргінец сказаў: "Мы знойдзем кнігу".