Чыноўнік Мінкульта пра "Смерць Сталіна": Пра фільм не скажу. Рэкламаваць не буду

Міністэрства культуры Беларусі дазволіла пракат фільма “Смерць Сталіна”. Як патлумачыла Еўрарадыё прэс-сакратарка Ілона Немава, фільм нават не будуць накіроўваць у экспертную камісію:

"Міністэрства культуры не супраць пракату фільма "Смерць Сталіна" у кінатэатрах краіны. Спецыялісты міністэрства не знайшлі ў фільме парушэнняў заканадаўства. Накіроўваць фільм у Рэспубліканскую экспертную камісію для атрымання заключэння лічым немэтазгодным".

Якая ў фільма будзе ўзроставая катэгорыя, пакуль невядома, бо праваўладальнік фільма не падаў заяўку на класіфікацыю фільма:

"Праваўладальнік пакуль яшчэ не падаў заяўку на класіфікацыю фільма. Вось калі яны пададуць, то камісія пры Інстытуце культуры і вырашыць, які ўзроставы рэйтынг будзе ў фільма. Я думаю, што, хутчэй за ўсё, 18+, бо ў іншых краінах ён таксама ідзе пад гэтым рэйтынгам", — тлумачыць начальнік упраўлення па кінематаграфіі Мінкультуры Аляксандр Рыдван.

На пытанне, як яму фільм, ён адмовіўся адказваць: "Я лічу не вельмі этычным і прафесійным распавядаць такое. Рэкламаваць не буду. Ці спадабаўся ён мне, не скажу. Атрымаецца, быццам бы я гэты фільм рэкламую".

Пракат фільма плануецца пачаць 8 лютага. Карціну пакажуць у кінатэатрах сеткі Silver Screen ў ТРЦ Galileo і Dana Mall у Мінску. Квіткі ўжо прадаюцца па узроставай катэгорыі 18+.

Паказаць кіно ў Беларусі планавалі два прыватныя кінатэатры, дзяржаўныя нават не бралі яго ў пракат, бо “Мінсквідэапракат” “прадказаў нізкую цікавасць да фільма”.

Прэм’ера фільма мусіла адбыцца 25 студзеня, у кінатэатры “Falcon club”. Таксама “Смерць Сталіна” збіраліся паказаць у кінатэатры “Silver screen”. У суседняй Расіі таксама спачатку спынілі продаж квіткоў на фільм, а пасля наогул яго забаранілі.