Дыпламаты Еўрасаюза, Вялікабрытаніі, ЗША і Швейцарыі наведалі Курапаты
29 кастрычніка дыпламаты Еўрасаюза, Вялікабрытаніі, ЗША і Швейцарыі наведалі Курапаты. Яны традыцыйна гэта робяць напярэдадні Дзядоў, "каб згадаць пра незлічоныя жыцці і таленты, знішчаныя пошасцю таталітарызму". "Пашана тым беларусам, што мужна і настойліва працуюць дзесяцігоддзямі дзеля таго, каб дарог смерці больш не было ніколі", — піша прэс-служба Прадстаўніцтва ЕС у Беларусі.
29 кастрычніка — чорны дзень беларускай гісторыі. У 1937 годзе савецкая ўлада за адну ноч расстраляла больш за 100 прадстаўнікоў беларускай інтэлігенцыі. Сярод іх былі 22 літаратары — выдатныя паэты і пісьменнікі. Беларусы на радзіме і ў замежжы ўдзельнічаюць у акцыі "Ноч расстраляных паэтаў".
У Курапатах дыпламатаў "атакавалі" прапагандысты з дзяржаўных тэлеканалаў. Ускладанне кветак ахвярам сталінскіх рэпресій суправаджалася іх воклічамі. Дыпламаты прапагандыстаў ігнаравалі.
