Эміль Чэчка можа быць беларускім шпіёнам ці інфарматарам

Эміль Чэчка можа быць беларускім шпіёнам ці як мінімум інфарматарам. Гэтую версію сур'ёзна разглядаюць польскія спецслужбы, паведамляе Onet. Таксама, паводле інфармацыі польскага выдання, сястра маладога чалавека жыве з грамадзянінам Беларусі, а ў самога Чачкі ёсць там сябры.

17 снежня беларускія памежнікі паведамілі аб пераходзе польскага салдата. Ён, паводле іх слоў, папрасіў палітычнага прытулку, бо нібыта нязгодны з палітыкай Польшчы ў міграцыйным крызісе. Міністр абароны Польшчы Марыюш Блашчак паведаміў, што ў вайскоўца "былі сур'ёзныя праблемы з законам". Па неафіцыйных дадзеных, на мінулым тыдні Эміль Чэчка быў затрыманы за кіраванне ў нецвярозым стане, меў у крыві 1,5 праміле алкаголю і быў пад уздзеяннем марыхуаны.

Onet лічыць, што менавіта праблемы з законам паслужылі каталізатарам рашэння аб уцёках у Беларусь. У самога салдата, паводле інфармацыі выдання, былі сувязі ў Беларусі, а пераход мяжы мог быць спланаванай аперацыяй спецслужбаў.

У Польшчы дзеянні ваеннага кваліфікаваны па артыкуле "Дэзертырства". Яму пагражае да 10 год пазбаўлення волі.