Генсек NATO: Расія не зможа перамагчы ў ядзерным канфлікце
Енс Столтэнберг / twitter.com/jensstoltenberg
"Расія не зможа перамагчы ў ядзерным канфлікце", — заявіў у сераду ў інтэрв'ю Reuters генеральны сакратар NATO Енс Столтэнберг. Так ён пракаментаваў чарговы ядзерны шантаж Уладзіміра Пуціна, які прагучаў у яго відэазвароце з нагоды аб'яўлення ў Расіі частковай мабілізацыі. Ядзерную рыторыку Пуціна Столтэнберг назваў безразважнай, а саму ідэю ядзернай вайны абсурднай.
Па словах Енса Столтэнберга, NATO пакуль не бачыць зменаў у гатоўнасці ядзерных сіл РФ, але працягвае сачыць за сітуацыяй і "захоўвае пільнасць". Ён таксама адзначыў, што расійскія войскі цяпер дрэнна забяспечаныя, ім не хапае ані камандзіраў, ані кантролю.
Краіны NATO будуць па-ранейшаму дапамагаць Украіне, а Расію чакаюць новыя санкцыі, падкрэсліў Столтэнберг.
