Хто хоча стаць дэпутатам парламента? Шмат сумнавядомых імёнаў

15/01/2024 - 17:57

Хто ідзе на выбары? / Canva

25 лютага ў Беларусі адбудуцца выбары ў Палату прадстаўнікоў, а таксама ў мясцовыя саветы. 15 студзеня скончылася вылучэнне ў кандыдаты. З 16 да 30 студзеня будзе праходзіць іх рэгістрацыя.

Да 15 студзеня ініцыятыўныя групы збіралі подпісы за вылучэнне кандыдатаў. Каб зарэгістравацца, неабходна сабраць мінімум 1000 подпісаў.

Улады заявілі, што на выбары не будуць запрошаныя міжнародныя назіральнікі ад АБСЕ. Нібыта праз накладзеныя на Беларусь санкцыі місія "цалкам падарвала давер да сябе ў тым, што тычыцца магчымасці аб'ектыўнага назірання за электаральным працэсам у Беларусі".

Усяго права збіраць подпісы атрымалі 164 ініцыятыўныя групы, з іх 50 — у Мінску.

Хто ж ідзе ў "палатку"? Прапагандысты, сілавікі, а можа, спартоўцы? Еўрарадыё паглядзела, хто з вядомых дзеячаў рэжыму вылучае сваю кандыдатуру ў дэпутаты.

Дзмітрый Шаўцоў

Першы, хто практычна адразу ж кідаецца ў вочы, — Дзмітрый Шаўцоў, скандальна вядомы кіраўнік Чырвонага Крыжа ў Беларусі. У звестках пра ініцыятыўныя групы па зборы подпісаў сказана, што ён вылучаецца ад Паўночнай выбарчай акругі №91 горада Мінска.

Па адукацыі Шаўцоў доктар. З 2012 да 2020 года ўжо займаў пасаду дэпутата Палаты прадстаўнікоў, пасля гэтага быў загадчыкам адной з мінскіх бальніц. З 2021 года — старшыня Беларускага Чырвонага Крыжа.

Пасля нападу Расіі на Украіну Чырвоны Крыж пад кіраўніцтвам Шаўцова заняўся ў тым ліку вывазам дзяцей з часова акупаваных украінскіх тэрыторый.

Шаўцоў не хавае, што выступае з прарасійскай пазіцыяй. У эфіры дзяржканалаў ён часта транслюе тэзісы расійскай прапаганды і апраўдвае дзеянні Лукашэнкі і Пуціна.

Аляксандр Шпакоўскі

Наступны — Аляксандр Шпакоўскі. Яго вы напэўна бачылі ў смешных нарэзках відэа і разнастайных мемах. Па ўзроўні сваёй ваяўнічасці прапагандыст саступае хіба што свайму калегу па цэху Рыгору Азаронку.

Шпакоўскаму 40 гадоў. Мае адукацыю юрыста і гісторыка. Дырэктар цэнтра "Актуальная канцэпцыя" і чалец навукова-экспертнай групы пры дзяржсакратарыяце Савета бяспекі Беларусі.

У 2021 годзе распрацоўваў папраўкі да Канстытуцыі. Даволі часты госць расійскіх прапагандысцкіх шоу, дзе не скупіцца на няўхвальныя каментары на адрас Украіны і краін Захаду.

Напрыклад, так ён каментаваў магчымы напад салдат ПВК "Вагнера" на Польшчу:
"Я не выключаю, што партызаны, людзі добрай волі, могуць зладзіць у гэтым Жэшуве паганым, у аэрадроме, тую самую знакамітую бавоўну".

Сяргей Клішэвіч

Далей у нашым аглядзе размясціўся сябра Камуністычнай партыі Беларусі Сяргей Клішэвіч. Мае гістарычную адукацыю. У 2017 годзе абраны першым сакратаром Мінскага гарадскога камітэта БРСМ. Цяпер вылучаецца на свой другі дэпутацкі тэрмін.

У 2020 годзе выказваўся супраць увядзення каранцінных мераў падчас распаўсюджвання каранавіруса. А падчас прэзідэнцкай выбарчай кампаніі Клішэвіч заявіў, што масавыя акцыі пратэсту ладзяць прыезджыя падрыхтаваныя людзі, "перакінутыя з іншых рэгіёнаў і нават з іншых краін", якія "прыкрываюцца моладдзю для карцінкі".

Акрамя таго, выступаў за адлічэнне студэнтаў, якія ўдзельнічалі ў акцыях супраць фальсіфікацыі выбараў, а на адным з велапрабегаў на праспекце Незалежнасці паказваў аўтамабілям, што сігналілі, сярэдні палец.

Алег Гайдукевіч

Адзін з самых скандальных праўладных палітыкаў Алег Гайдукевіч таксама вылучаецца ў Палату прадстаўнікоў ужо другі раз. З 1998 да 2012 працаваў у міліцыі, сышоў адтуль і далучыўся да ліберальна-дэмакратычнай партыі Беларусі. У 2019-м змяніў на пасадзе яе кіраўніка свайго бацьку — Сяргея Гайдукевіча.

Збіраў подпісы за вылучэнне сябе кандыдатам у прэзідэнты ў 2020 годзе, аднак неўзабаве заявіў, што адмаўляецца ад удзелу на карысць Лукашэнкі.

Пастаянна выступае ў эфіры прапагандысцкіх СМІ з рэзкай крытыкай беларускіх дэмсілаў і беларусаў, якія вымушана з'ехалі. У прыватнасці, казаў, што "экстрэмістаў можна затрымаць і на тэрыторыі іншых дзяржаў і прывозіць сюды ў багажніку, напрыклад, і адразу ў СІЗА".

У 2021 Гайдукевіч заявіў, быццам яго дом хацелі падпаліць і кінулі тры бутэлькі з "кактэйлем Молатава". Адзінай пацярпелай стала яго котка, у якой быў абпалены нос. У выніку па справе пра падпал яго дома праходзілі 18 чалавек, многім з іх прысудзілі больш за 20 гадоў турмы.

Вадзім Гігін

Прапагандыст, былы дэкан факультэта філасофіі і сацыяльных навук БДУ, а цяпер дырэктар Нацыянальнай бібліятэкі Беларусі, Вадзім Гігін вырашыў балатавацца ад Партызанскай акругі №110.

Гігін — найвядомейшы прыхільнік Лукашэнкі, у 2020 годзе, падчас масавых акцый пратэсту, сцвярджаў, што Захад не задавальняе беларуская стабільнасць і што змена ўлады ў Беларусі — першы крок для звяржэння Уладзіміра Пуціна ў Расіі.

Аднак у жніўні 2020 года, з'яўляючыся на той момант дэканам ФФСН БДУ, ездзіў у міліцэйскія ўчасткі з просьбай вызваліць студэнтаў.

У 2021 у адказ на нежаданне брэнда NIVEA фінансаваць Чэмпіянат свету пахакеі ў Мінску Гігін заявіў, што выкінуў пустыя цюбікі брэнда, і расказаў, што "раней карыстаўся маркай".

Прапагандыст чакана падтрымаў уварванне Расі ва Украіну ў 2022-м і нават ездзіў назіраць за рэферэндумам, які праходзіў у "ЛНР".

Аляксандр Барсукоў

Аляксандр Барсукоў — адзін з прадстаўнікоў сілавога блока, які заявіў пра жаданне стаць дэпутатам парламента. Вылучаецца ад Паўднёва-заходняй акругі №110. Цяпер з'яўляецца памочнікам Лукашэнкі — інспектуе Мінск.

З 2017 да 2020 займаў пасаду намесніка міністра ўнутраных спраў. Быў адным з кіраўнікоў, якія займаліся падаўленнем мірных акцый пратэстаў па выніках прэзідэнцкіх выбараў 2020 года. Заяўляў, што ніякіх здзекаў з людзей не было. Мае званне генерал-маёра.

Анастасія Мірончык-Іванова

Лёгкаатлетка Анастасія Мірончык-Іванова, што неаднаразова прызнавалася ў сімпатыі да дзейнай улады, вырашыла звязаць сваю будучыню з палітыкай.

Спартоўцы 34 гады, яе кар'ера падыходзіць да канца. Апошні вялікі старт быў у 2021 годзе на Алімпіядзе ў Токіа, там яна заняла 14-е месца. Самае вялікае дасягненне — бронза на чэмпіянаце свету 2011 года.

У інтэрв'ю Марату Маркаву на тэлеканале АНТ у снежні мінулага года выказала меркаванне, што беларускім спартоўцам не варта ўдзельнічаць на Алімпіядзе ў Парыжы ў нейтральным статусе: "Ніякіх саступак! Толькі пад нацыянальным сцягам, толькі з гімнам, толькі ў сваёй экіпіроўцы, дзе відаць наш арнамент".

Са словаў беларускай лёгкаатлеткі Крысціны Ціманоўскай, у 2020 годзе Мірончык-Іванова падала на яе ў суд і спагнала 250 долараў за тое, што Крысціна назвала яе ягадзічную мышцу "задніцай".

Гэта далёка не поўны спіс тых, хто выказаў жаданне стаць дэпутатам Палаты прадстаўнікоў. Мы расказалі толькі пра адных з самых адыёзных, скандальных і ў чымсьці нават недарэчных кандыдатаў.