Колькасць бальніц у Беларусі знізілася да гістарычнага мінімуму — іх цяпер 585
У Беларусі істотна скарацілася колькасць клінік / pixabay.com
Колькасць бальніц у Беларусі дасягнула гістарычнага мінімуму, піша Беларускі расследвальніцкі цэнтр. За 30 гадоў іх стала менш у паўтара раза.
У 1990 годзе ў Беларусі працавалі 874 бальніцы, на канец 2022-га іх у краіне налічвалася 585.
Як адзначаюць у БРЦ, рэзкае скарачэння лякарняў пачалося з пачатку стагоддзя: ад 2000-га па 2020 год зачыніліся 230 бальніц, а за апошнія два гады — яшчэ 15.
Найбольш пацярпела ад закрыцця клінік Магілёўская вобласць: там за 30 гадоў зачынілася больш за палову бальніц — 65 з 124. У Віцебскай вобласці за гэты ж перыяд стала менш на 59 бальніц, у Гродзенскай — на 52.
Зніжаецца апошнімі гадамі і колькасць практыкуючых лекараў. На канец 2022-га ў Беларусі працавалі 47 999 дактароў. У 2020-м іх было 48 527 чалавек.
Асабліва дэфіцыт у медыцыне стаў адчувацца пасля пачатку рэпрэсій 2020 года. Як распавядала Еўрарадыё, у Мінску ў медыцыне застаюцца вакантнымі больш за чатыры тысячы працоўных месцаў.
