"Крумкачы" сабралі на рэабілітацыю Юрыя Турэйкі больш за 10 тысяч рублёў
“Крумкачы” сабралі на рэабілітацыю камерцыйнага дырэктара каманды Юрыя Турэйкі больш за 10 тысяч рублёў. За тыдзень збору квіткі на дабрачынны матч з “Іслаччу” набылі 626 чалавек. Усе сродкі пойдуць сям’і Юрыя.
“Мы яшчэ раз пераканаліся ў сіле слова і — што побач з "Крумкачамі" знаходзяцца людзі, якія заўсёды гатовы адгукнуцца на просьбу, якія гатовы дапамагчы і падтрымаць!” — расчулена кажуць у клубе.
Калі вы хочаце далучыцца да акцыі і дапамагчы Юрыю — квіткі на дабрачынны матч можна набыць да канца тыдня.
Як распавядала Еўрарадыё, у Юрыя Турэйкі паўтара месяца таму проста на матчы, які ён каментаваў, здарыўся інсульт. Са стадыёна яго забрала "хуткая". У бальніцы здарыўся яшчэ адзін інсульт, а пасля — інфаркт. Два тыдні Турэйка быў у коме, месяц — у рэанімацыі. Каманда вырашыла зрабіць матч 1/16 фіналу Кубка Беларусі з "Іслаччу" дабрачынным і перадаць грошы сям'і Турэйкі.
