Чыгуначную ветку ў Калядзічах выставілі на аўкцыён
Чыгунка ў Калядзічах / "ІПМ-Таргі"
На аўкцыён у Беларусі працягваюць выстаўляць незвычайныя лоты. У снежні так паспрабуюць прадаць чыгуначную ветку ў прамысловым вузле Мінск-Калядзічы, заўважыў сайт Office Life.
Чыгуначны аб'ект выстаўлены на пляцоўцы "ІПМ-Таргі". Ён належыць гандлёваму ўнітарнаму прадпрыемству "Белкаапзнешгандаль Белкаапсаюза", якое збанкрутавала ў лістападзе 2023 года.
Чыгуначная ветка, размешчаная ў Мінску на вуліцы бабушкіна, 62, мае плошчу амаль 700 квадратных метраў. Акрамя самой чыгункі ў лот уключаныя халадзільны агрэгат, аўтаматычная ўстаноўка вадзянога пажаратушэння, ахоўная сігналізацыя і некалькі сістэм кандыцыянавання.
Пачатковы кошт лота — больш за 847 тысяч рублёў. Патэнцыйныя пакупнікі для ўдзелу ў таргах павінныя пакінуць задатак — 10% ад пачатковага кошту, або 84,7 тысячы рублёў.
Таргі прызначаныя на 17 снежня.
