Лукашэнка: Агідна глядзець на гульню, што мінскага "Дынама", што зборных

18 снежня падчас нарады, прысвечанай развіццю летніх відаў спорту, Аляксандр Лукашэнка загаварыў пра хакей. Ён бачыць прычыну няўдачы маладзёжнай зборнай Беларусі па хакею найперш у кепскай працы трэнераў.

"Мы прайграем тым камандам, якіх мы два гады таму на адным каньку абыгрывалі, — цытуе словы Лукашэнкі БЕЛТА. — Агідна глядзець на гульню, што мінскага "Дынама" [у КХЛ], што зборных камандаў. Гэта праца трэнераў".

Аляксандр Лукашэнка робіць наступную выснову: "Агідная падрыхтоўка трэнераў". Ён адзначыў, што іх выпускаецца ўтрая больш, чым працуе. Кіраўнік дзяржавы загадаў прыняць меры: калі трэнер не хоча працаваць па спецыяльнасці, у яго трэба забраць дыплом. Трэнерамі мусяць быць "адданыя і надзейныя людзі", сказаў Лукашэнка. Ён прывёў дадзеныя, што ў асобных відах спорту за апошняе дзесяцігоддзе падрыхтавана ў паўтара-два разы больш трэнераў, чым цяпер працуе. "Дзе астатнія?", — спытаў ў прысутных беларускі кіраўнік.

Лукашэнка патлумачыў, чаму так важныя трэнеры для спорту: "На плячах трэнера ляжыць асноўная адказнасць за пошук, адбор, падрыхтоўку і матывацыю будучых чэмпіёнаў". Пры стварэнні неабходных умоваў для спецыяліста за яго працай, за ўлікам навучэнцаў неабходны эфектыўны кантроль.