Лукашэнка хацеў “пад плінтус запаўзці”, каб не бачыць беларускіх біятланістаў

Аляксандр Лукашэнка на нарадзе, прысвечанай развіццю зімовых відаў спорту, жорстка выказаўся пра сітуацыю ў мужчынскім біятлоне. Асабліва яго засмучаюць выступленні біятланістаў на Алімпіядзе ў Пхёнчхане: “Часам глядзіш на нашых мужыкоў, якія бегаюць з вінтоўкамі, і такой ганьбы… Хацелася б кудысьці ад яго схавацца — кудысьці пад венік, пад плінтус запаўзці, каб гэтага не бачыць”.

Таксама Лукашэнка згадаў і жаночы біятлон. Паводле яго слоў, у нашай зборнай не відаць біятланістак, якія з часам маглі б замяніць Дар’ю Домрачаву і Надзею Скардзіну: “І калі нехта ацэньвае выступ жаночай каманды па біятлоне як паспяховы, то я б прапанаваў гэтым людзям прачнуцца і паглядзець рэальна на тое, як выступалі нашы біятланісты ўвогуле і дзяўчаты таксама”.

Кіраўнік дзяржавы сказаў, што залатыя медалі беларусаў на Алімпіядзе — “хутчэй выпадковасць, чым заканамернасць”. Ён заклікаў за гэтымі вынікамі бачыць праблемы “і ў падрыхтоўцы, і ў спартсменах, і ў саміх трэнерах”. Біятлон нельга страціць, сказаў Аляксандр Лукашэнка.