Лукашэнка параіў ДАІ не ствараць лішніх праблемаў для людзей
28 студзеня Аляксандр Лукашэнка прысутнічаў на калегіі МУС Беларусі. Ён выказаўся пра працу органаў унутраных спраў, пра іх задачы, пра сітуацыю са злачыннасцю ў краіне. Лукашэнка пакрытыкаваў ДАІ за непатрэбныя новаўвядзенні.
"Грамадскасць відавочна негатыўна ацэньвае асобныя наватарствы, — цытуе словы кіраўніка дзяржавы БЕЛТА. — У прыватнасці, беспадстаўнае перагароджванне аўтадарог знакамі рамонту для правядзення пад гэтым выглядам нейкіх праверак... Стварылі затор, людзі незадаволеныя. Знайдзіце іншыя метады. Не стварайце лішніх праблем".
Аляксандр Лукашэнка папярэдзіў супрацоўнікаў ДАІ пра праверкі ў справе выяўлення патэнцыйных хабарнікаў. Ён не лічыць гэта правакаваннем. "Ніякага правакавання. Гэта мы будзем рабіць. Не бярэш — не бяры ўвогуле. Асобныя гэтыя факты мы павінны выкараніць", — сказаў кіраўнік Беларусі.
