Лукашэнка прыгразіў спыніць прапампоўку газу ў Еўропу
Транзіт газу можа быць перакрыты ў выпадку ўвядзення санкцый супраць Беларусі
Газаправод Ямал-Еўропа можа быць перакрыты ў выпадку, калі Еўрасаюз увядзе новыя пакеты санкцый супраць Беларусі і закрые межы з рэспублікай, заявіў Аляксандр Лукашэнка на нарадзе з кіраўніцтвам Саўміна ў чацвер.
Транснацыянальны экспартны магістральны газаправод Ямал-Еўропа праходзіць праз тэрыторыю Беларусі, прычым апошнім часам аб'ём транзіту газу з Расіі на Захад значна вырас.
"Мы абаграваем Еўропу, яны нам яшчэ пагражаюць, што закрыюць мяжу. А калі мы перакрыем прыродны газ туды? Таму я б кіраўніцтву Польшчы, літоўцам і іншым безгаловым парэкамендаваў думаць перш чым гаварыць. Але гэта іх справа. Закрыюць — няхай закрываюць. Але МЗС павінен папярэдзіць усіх у Еўропе: калі толькі яны ўвядуць нам дадатковыя санкцыі, "неператраўныя" і "непрымальныя" для нас, мы павінны адказваць", — цытуе словы Лукашэнкі яго прэс-служба.
Як паведамляла Еўрарадыё, 11 лістапада Лукашэнка заявіў, што ў лагер мігрантаў на беларуска-польскай мяжы спрабуюць перакінуць зброю і боепрыпасы. Паводле яго словаў, гэта адбываецца для таго, каб справакаваць канфлікт.
