Лукашэнка прызначыў камандуючага ўнутранымі войскамі
Аляксандр Лукашэнка прызначыў камандуючага ўнутранымі войскамі, намесніка міністра ўнутраных спраў. Ім стаў Юрый Назаранка, які апошнія паўтара года кіраваў штабам Службы бяспекі прэзідэнта.
Як інфармуе БЕЛТА, Назаранку 43 гады. Ён — ураджэнец Слоніма. Скончыў вайсковую акадэмію, служыў ва ўнутраных войсках (з 1997-га — у в/ч 3214, з 2009-га — у Брэсце). У 2010-2014 гадах — у Службе бяспекі прэзідэнта. У 2014-м стаў камандзірам Спецыяльнага атрада хуткага рэагавання в/ч 3214, а з лютага 2016 года — камандзірам САХР 3-й асобнай брыгады спецпрызначэння ўнутраных войскаў. У СБП Юрый Назаранка вярнуўся ў пачатку вясны мінулага года.
Падчас прызначэння Лукашэнка адзначыў падрыхтаванасць САХР, якім раней камандаваў Назаранка. "Гэта вельмі падрыхтаваны атрад, — гаварыў кіраўнік дзяржавы. — Я добра гэта ведаю, таму што прымаў актыўны ўдзел у яго фармаванні, калі ён толькі зараджаўся".
"Тое, што вы не кіравалі злучэннямі, не думаю, што гэта вялікі недахоп, — цытуе словы Аляксандра Лукашэнкі яго прэс-служба. — Вам не трэба будзе франтамі кіраваць — вам трэба будзе забяспечыць парадак у краіне. Пры неабходнасці, калі давядзецца задзейнічаць нашы ўнутраныя войскі... Не дай бог што, мы, людзі ў пагонах, усе пойдзем на фронт, калі пагроза будзе звонку".
Пасада камандуючага ўнутранымі войскамі стала вакантнай у чэрвені 2019-га, калі Юрый Караеў быў прызначаны міністрам унутраных спраў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
