Магілёўца прымусілі заплаціць за тое, што яго 15 гадоў шукалі сілавікі
Супрацоўнік пракуратуры, ілюстрацыйнае фота / prokuratura.gov.by
Магілёўца абавязалі выплаціць грошы за тое, што ён быў у вышуку, паведамляе прэс-служба пракуратуры.
У 2008 годзе на мужчыну пачалі крымінальную справу за атрыманне хабару. Магілёвец схаваўся ад следства. Знайсці яго не маглі 15 гадоў, таму справу закрылі па заканчэнні тэрміну даўнасці — па нерэабілітуючых падставах.
Пракуратура пастанавіла спыніць вышук абвінавачанага. Аднак першы намеснік пракурора Магілёўскай вобласці вынес пастанову, што з мужчыны трэба спагнаць выдаткі, звязаныя з яго вышукам. Іх налічылі 1110 рублёў.
Мяркуючы па ўсім, магілёвец пасля закрыцця справы знайшоўся і заплаціў грошы за свой пошук: пракуратура паведаміла, што сродкі паступілі ў бюджэт.
