Міхаіл Мясніковіч наведаў Казахстан: "вар'яцкая праца"
24 лютага старшыня калегіі Еўразійскай эканамічнай камісіі Міхаіл Мясніковіч наведаў Казахстан. Ён сустрэўся з прэзідэнтам гэтай краіны Касым-Жамартам Такаевым. Былі абмеркаваны перспектывы Еўразійскага эканамічнага саюза і ўзаемадзеянне Казахстана з камісіяй, паведамляе тэлеканал АНТ.
"Наперадзе вар'яцкая праца, — цытуе словы Мясніковіча тэлеканал СТБ. — ...Найперш трэба ліквідаваць усе перашкоды, якія сёння ёсць на еўразійскім эканамічным рынку".
Па словах кіраўніка ЕЭК, існуе "вялізная прорва паміж палітычнай воляй, якую акрэслілі кіраўнікі дзяржаў" і тымі, хто займаецца рэалізацыяй. Міхаіл Мясніковіч бачыць выхад у тым, каб усе краіны-удзельніцы Еўразійскага эканамічнага саюза адначасова ліквідавалі ўсе бар'еры. У згаданы саюз уваходзяць Беларусь, Расія, Арменія, Казахстан і Кыргызстан.
Мясніковіч — былы прэм'ер-міністр Беларусі, экс-кіраўнік Адміністрацыі прэзідэнта, Нацыянальнай акадэміі навук і Савета Рэспублікі. Ён узначаліў Еўразійскую эканамічную камісію сёлета. Яго кандыдатуру прапанаваў Аляксандр Лукашэнка.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
