Міхаіл Мясніковіч: пераход на расійскі рубель абмяркоўваецца

Краіны Еўразійскага эканамічнага саюза абмяркоўваюць магчымасць пераходу на расійскі рубель як адзінага сродку ўзаемных разлікаў. Пра гэта старшыня Калегіі Еўразійскай эканамічнай камісіі (ЕЭК) Міхаіл Мясніковіч распавёў у інтэрв'ю на тэлеканале "Беларусь 1".

"Пытанне актыўна абмяркоўваецца, але часцяком кан'юктурна", — падкрэсліў ён. Мясніковіч заявіў, што плануе сустрэцца з кіраўнікамі цэнтрабанкаў усіх краін ЕАЭС, каб абмеркаваць, у тым ліку, адзіную валюту. Але ці будзе гэта менавіта расійскі рубель, пакуль не вядома. 

Па словах старшыні Калегіі ЕЭК, усе краіны ЕАЭС маюць адмоўнае гандлёвае сальда з Расіяй. Ім нестае рублёвай выручкі, каб разлічыцца за расійскі імпарт. "Мы павінны прадаць штосьці ў трэція краіны, за валюту канвертаваць расійскія рублі і толькі потым працаваць у рублёвай зоне", — патлумачыў ён.

Мясніковіч падкрэсліў: "Ніхто не кажа, што заўтра нехта будзе пераходзіць на расійскі рубель. Нам трэба думаць пра дэдаларызацыю, але пры гэтым з адной праблемы не стварыць іншую".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.