Мінабароны Расіі таксама вярбуе на вайну зняволеных у калоніях
Перад адпраўкай на фронт / ria.ru
Мінабароны Расіі таксама вярбуе на вайну зняволеных у калоніях, піша istories.media. Для іх стварылі спецыяльны армейскі атрад. Гэтых людзей пераконваюць, што ў ім больш шансаў выжыць, чым у наймітаў-вагнераўцаў Яўгена Прыгожына (менавіта яны і пачалі летам вярбоўку зняволеных, абяцаючы ім памілаванне), а ўмовы па аплаце і памілаванні аднолькавыя (кантракт — паўгода).
Выданне сцвярджае, што Мінабароны РФ пачало вярбоўку ў верасні. Яго прадстаўнікі наведвалі калоніі, дзе адбываюць пакаранне былыя супрацоўнікі сілавых структур (вядомыя факты ў Разанскай вобласці і ў Стаўрапольскім краі).
Пра вярбоўку зняволеных Мінабароны Расіі паведамляў і праект Gulagu.net. Адзначалася, што ў адным з вядомых выпадкаў вярбоўшчыкамі выкарыстоўваліся пагрозы.
